Kristófer Tjörvi setti mótsmet í Eyjum
Kristófer Tjörfi Einarsson er klúbbmeistari Golfklúbbs Vestmannaeyja 2024 en hann lék á níu höggum undir pari á 72 holunum og setti mótsmet.
Kristófer lék fyrsta hringinn á 65 höggum, 5 undir og hélt forystu frá fyrsta degi og út mótið. Lárus G. Long varð annar, tíu höggum á eftir meistaranum, á höggi yfir pari, þriðji varð fimmtánfaldur klúbbmeistari, Örlygur Helgi Grímsson á sex yfir pari. Fimmtán keppendur voru í meistaraflokki í mótinu sem hlýtur að teljast ansi gott hjá ekki fjölmennari klúbbi.
Konurnar eru ekki eins fjölmennar í meistaraflokki, aðeins tvær en Sóley Óskarsdóttir sigraði á 335 höggum. Önnur varð Katrín Harðardóttir á 369 höggum.
