Kylfukast: Samanburður í árslok 2010

Nú er í þriðja sinn lagður fram samanburður á rekstri stærstu klúbba landsins.  Undanfarin tvö ár hafa tölur úr ársreikningum GKG, GO, GR og GK verið settar fram á sama formi og ársreikningur GKG. Markmiðið er fyrst og fremst að vekja áhuga kylfinga á ársreikningi sins klúbbs og bera saman við aðra klúbba.  Að þessu sinni hefur árseikningur GO ekki verið birtur á heimasíðu klúbbsins, né hefur reikningurinn fengist sendur frá framkvæmdastjóra klúbbsins.  Því er GO ekki með í samanburðinum að þessu sinni.

Sem fyrr er GK að skila mestum fjármunum frá rekstri nú 44 mkr. Rekstur GKG skilar 41 mkr., en GR 26 mkr.

Mikil fjölgun félagsmanna í GKG er athygliverð, en þar eru nú 1740 félagsmenn, 180 fleiri en árið 2009. Samhliða þessari gríðarlegu fjölgun í klúbbnum aukast tekjur klúbbins af vallargjöldum um 25% úr 8 í 10 mkr.  Meðan stendur félagafjöldi hjá GR og GK í stað og tekjur af vallargjöldum minnka.

Skuldastaða klúbbanna er nokkuð mismunandi.  GKG hafa verið mjög duglegir að greiða niður skuldir, en þær hafa farið úr 90 mkr (2008) í 40 mkr(2010). Keilismenn berjast við að greiða niður skuldir af glæsilegu æfingasvæði sínu, Hraunkoti.  Vaxtagjöld GK á árinu eru 13,5 mkr., en  Hraunkot skilar 9,9 mkr. hagnaði.  Skuldastaða GR er hrikaleg í ársreikningnum, 191 mkr, þar af 185 skráðar sem skammtímaskuld.  Í nóvember síðastliðnum var skrifað undir frægan samning við Reykjavíkurborg sem strax lagaði stöðuna um 50 mkr. og svo aðrar 40 mkr. til viðbótar í febrúar 2011.

Samhliða samantektinni í fyrra spurði ég spurningarinnar hvort hámarkinu væri náð, hvað varðaði fjárhæð árgjalda í golfklúbbum. Stjórnir klúbbanna virðast ekki sammála, GR hækkaði árgjöld um 4.000 kr, það sama gerðu Keilismenn, en hjá GKG verður árgjaldið óbreytt.  Hvað sjálfan mig varðar greiddi ég félagsgjald í GR, kr. 75.000.   Á tímabilinu lék ég 18 hringi, þann fyrsta 24. apríl á Hellu og þann síðasta í Grafarholti 18. september.  Alls lék ég á völlum GR 8 hringi fyrir félagsgjaldið eingöngu, 2 hringi á vinavöllum ( 2 x 800 kr.), 1 hring í innnafélagsmóti (2.000 kr.),  3 hringi í opnum mótum (3 x 3.500), 3 hringi gegn greiðslu vallargjalds (3 x 3.000), 1 hring í boðsmóti (0 kr.).   Samtals fóru því í golfleik kr. 98.100.  Hver hringur sem ég lék fyrir félagsgjaldið eingöngu kostaði mig því kr. 9.375, en meðalverð golfhrings þetta árið var 5.450 kr.  Þá er ótalinn kostnaður við veitingasölu, bolta-, búnaðar- og fatakaup, sem reyndar var allt með minnsta móti þetta sumarið.

Golfsumarið 2010 virðist hafa verið ennþá stærra en 2009.  Mikil aukning var á leiknum hringjum hjá öllum klúbbunum.  Ef teknar eru tekjur tilkomnar vegna golfiðkunar (félagsgjöld, vallargjöld og mótatekjur) og deilt í þá tölu með leiknum hringjum á völlum klúbbanna, fæst út tala kalla má tekjur  af leiknum hring. (TLH).

Hjá GKG er TLH 2.258 kr., hjá GR 2.668* kr. og hjá GK 2.802 kr. 

Frá hlið klúbbanna mætti horfa á töluna þannig að aldrei ætti að vera í boði vallargjald sem er lægra en þessi tala, kannski mætti kalla þetta grunn-vallargjald.  Félagsmaðurinn ætti að margfalda leikna hringi á heimavelli með TLH.  GR-ingurinn þurfti því að leika 28 hringi til að fylla upp í árgjaldið,  Keilismaðurinn 25 og GKG-ingurinn 33.

* Að meðtöldum félags- og mótatekjum GL.