Afmælisgjöfin ekki skópar heldur gjafabréf að golfsetti

Björg Ýr Guðmundsdóttir er fædd og uppalin í Reykjavík en fluttist til Akureyrar árið 2007, dvölin átti að vara í tvö ár en fjölskyldan hefur ílengst og getur ekki hugsað sér að búa neins staðar annars staðar í dag. Björg byrjaði seint í golfi og hefði viljað byrja fyrr.

Björg Ýr er kylfingur dagsins.

Hvenær byrjaðir þú í golfi og hvernig gerðist það?

Ég byrjaði í golfi vorið 2016, hafði þá sagt í einhver ár að ég ætlaði að byrja í golfi þegar ég yrði „gömul“ og svo kom að því að eiginmaðurinn gaf mér golfnámskeið í afmælisgjöf þegar ég var 44 ára. Það voru blendnar tilfinningar þennan dag og ekki hjálpaði að gjafabréfinu var pakkað inn í skókassa, ég hélt auðvitað að ég væri að fá einhverja geggjaða skó í afmælisgjöf. En í dag lít ég á þetta sem bestu afmælisgjöf sem ég hef fengið, við hjónin fórum saman á byrjendanámskeið hjá Stulla og eftir það var ekki aftur snúið, við kolféllum fyrir þessu frábæra sporti og erum búin að kynnast svo frábæru fólki og eignast góða vini á golfvellinum. Eftir að við byrjuðum í golfi erum við búin að fara víða og spila golf, erlendis og hérlendis. Það toppar fátt að vera í góðum hópi og spila golf og hafa gaman og ekki verra ef það eru nokkrar keppnir í gangi. Mér finnst mjög gaman að keppa í golfi og er dugleg að taka þátt í allskonar mótum, við hjónin erum til dæmis búin að taka þátt í 8 mótum á sl 6 vikum, þetta er auðvitað bilun en bara svo sjúklega gaman.

Helstu afrek í golfinu?

Akureyrameistari 3. fl. kvenna 2020 og í 2. fl. kvenna 2022. Og að hafa komið tvíburasystur minni í golfið sumarið 2020, það tók mig 3 ár.

Hvað er það neyðarlegasta sem þú hefur lent í á golfvellinum?

Þegar upphafshöggið mitt á 18. holu á Jaðarsvelli fór í bunkerinn á 9. holu. Þetta var á lokadeginum í meistaramótinu 2021 og fullur pallur af fólki að fylgjast með, höggið úr bönkernum tókst sem betur fer vel en þetta tók á taugarnar.

Hver er „frægasti“ kylfingurinn sem þú hefur leikið með?

Bróðir minn Eiríkur Guðmundsson, hann er mitt idol í golfinu.

Ertu hjátrúarfull/ur hvað varðar golf?

Nei alls ekki.

Hvað er það sem þú þarft mest að bæta í þínum golfleik?

Sandgryfjuhögginn, þau hafa oft farið illa með skorið.

Aldur: 51

Klúbbur: Golfklúbbur Akureyrar

Forgjöf: 21,4

Uppáhaldsmatur: Indverskur matur og grillaður lax

Uppáhaldsdrykkur: Vatn og rauðvín

Uppáhaldskylfingur: Justin Thomas, hann er svo mikill keppnismaður og Andrea Líf Líndal systurdóttir mín, væri svo til í að hafa hennar sveiflu.