Sló fyrsta hringinn með rétthendri sjö-u en er snarörvhentur

Hjálmar Jens Sigurðsson er Reykvíkingur en býr í dag á Hornafirði og starfar þar sem sjúkraþjálfari. Hann er giftur og á þrjú börn. Fyrir utan golfið er hann mikill áhugamaður um körfuknattleik og var lengi í stjórn körfuknattleiksdeildar Sindra og eins var hann körfuknattleiksdómari. Hann dreymir um að þræða strandlengjur Írlands, spila golf og taka einn ferskan Guinnes á eftir, hugmyndina fékk hann eftir að hafa lesið bókina A Course Called Ireland: A Long Walk in Search of a Country, a Pint, and the Next Tee eftir Tom Coyne.

Hjálmar er kylfingur dagsins.

Hvenær byrjaðir þú í golfi og hvernig gerðist það?
Spilaði í fyrsta skipti golf úti á Tælandi árið 2002, alvöru golfvöllur og allir með „kaddý“. Sló heilan hring með 7 járni og áttaði mig á því að það væri kannski sniðugt að prófa kylfur fyrir örvhenta næst þar sem ég er alveg snarörvhentur. Flutti ekki löngu síðar á Hornafjörð, skráði mig í klúbbinn og byrjaði á fullu sumarið 2004 og þá réttum megin.

Helstu afrek í golfinu?

Að koma konunni í golf og fara tvisvar holu í höggi. Einu sinni á gömlu „brjóstunum“ eða nánar tiltekið 5. holu á gamla Silfurnesvellinum og svo á 2. holu á sjálfu Silfurnesinu.

Hvað er það neyðarlegasta sem þú hefur lent í á golfvellinum?

Að „shanka“ högg í golfbíl nánast við hliðina á mér.

Hver er „frægasti“ kylfingurinn sem þú hefur leikið með?

Án efa Venni „Páer“, við höfum átt margar skemmtilegar rimmur á golfvellinum og þá sérstaklega í Fimmta risamótinu.

Ertu hjátrúarfull/ur hvað varðar golf? 

Nei, meira svona vanafastur.

Hvað er það sem þú þarft mest að bæta í þínum golfleik?

Þarf að afslæsa fimm og þrjú tré á braut.                   

Aldur: 49

Klúbbur: Golfklúbbur Hornafjarðar

Forgjöf: 12,3

Uppáhaldsmatur: Nautalund og Bernease

Uppáhaldsdrykkur: Vatn og G&T

Uppáhaldskylfingur: Hovland

Þrír uppáhaldsgolfvellir: Silfurnesvöllur, Druids Glen (Írlandi) og Öndverðanes.

Þrjár uppáhaldsgolfbrautir á Íslandi:  2.holan á Silfurnesinu, getur gefið vel og refsað grimmilega, hér notar maður allt frá Pw og upp í 5 járn í upphafshögginu. 16. holan á Jaðri, fallleg hola þar sem gott útsýni er af teignum sem er vel fyrir ofan brautina. 8. holan á Öndverðanesinu, nóg pláss í drævinu en snúið annað högg.

Erfiðasta golfholan: 3. holan á Silfurnesinu oft ansi erfið ef upphafshöggin eru ekki inni og á móti blæs.

Erfiðasta höggið: Upphafshöggið á 9. á Silfurnesinu, þröngt lendingasvæði í dræverlengd og ansi margir boltar sem lenda í tjörninni.                          

Ég hlusta á: Í tónlist er 90´s alternative alltaf fyrsta val og svo auðvitað á konuna.

Besta skor: 77 (+5) á Hlíðardalsvelli í Mosó í sumar

Besti kylfingurinn: Tigerinn