Öruggur sigur Henderson

Brooke Henderson sigraði örugglega á fyrsta móti LPGA mótaraðarinnar sem fram fór á Lake Nona golfvellinum í Orlando. Hún lék lokahringinn á tveimur höggum undir pari og lauk leik á samtals 16 höggum undir pari eða fjórum betur en næstu keppinautar hennar sem voru Charley Hull frá Englandi og Maja Stark frá Svíþjóð. Þær léku báðar lokahringinn á þremur höggum undir pari og deila öðru sætinu á samtals 12 undir.

Brooke lék stöðugt og öruggt golf í dag og gerði það sem þurfti til að tryggja sér níunda sigurinn á mótaröðinni með glæsibrag. Nýi TaylorMade búnaðurinn sem hún var að nota í fyrsta skipti í móti virðist virka vel. Þrír fuglar og einn skolli, einfalt og öruggt golf. 

Nelly Korda sem haldið var að myndi helst ná að veita Brooke keppni átti erfiða dag á vellinum. Hún fékk þrjá skolla og þrjá fugla á hringnum og lék á sléttu pari. Nelly náði ekki að halda í við Brooke í lokaráshópnum í dag og féll niður í fjórða sæti.