Gunnlaugur í viðtali fyrir US Open - engar stórar væntingar en ætlar að njóta hvers höggs

„Það er í raun enginn staður sem ég myndi frekar vilja vera á en einmitt hérna þessa vikuna, þannig að ég er bara að drekka þetta allt í mig,“ sagði Gunnlaugur Árni Sveinsson í sjónvarpsviðtali á Shinnecock Hills vellinum í New York.

Eftir að hafa tryggt sér sæti á hinu virta opna bandaríska meistaramóti í golfi (U.S. Open) í gegnum stranga undankeppni er hann mættur til leiks sem fyrsti Íslendingurinn frá upphafi á þessu risamóti. Þetta er jafnframt hans fyrsta mót á sjálfri PGA-mótaröðinni. Gunnlaugur mætir til leiks með teymið sitt sér til halds og trausts og segist í viðtali ætla að njóta hvers augnabliks, læra af þeim bestu og mæta á teig án þess að láta stórar væntingar flækjast fyrir sér.

Hvernig hafa undirbúningsdagarnir fyrir U.S. Open gengið hingað til?

Ég kom hingað frekar snemma, lenti á laugardaginn og fór fyrsta hringinn á vellinum í gær. Völlurinn er frábær. Það blés hressilega í dag (mánudag), þannig að þetta er dálítið öðruvísi en í gær, en undirbúningurinn gengur mjög vel. Ég er með teymið mitt með mér hérna til að hjálpa mér og ég tek þessu bara dag fyrir dag. Ég reyni einfaldlega að vera eins tilbúinn og hægt er þegar fimmtudagurinn gengur í garð.“

Þú tryggðir þér þátttöku á U.S. Open í gegnum úrtökumót. Hver eru markmiðin þín fyrir vikuna?

„Fyrst og fremst að fá sem mest út úr þessu, hvort sem það er í formi úrslita, lærdóms eða hvers sem er. Ég er ótrúlega ánægður að vera hérna. Þetta er stórt skref, mitt fyrsta risamót og mitt fyrsta mót á PGA-mótaröðinni, þannig að ég ætla bara að reyna að hafa gaman af þessu. Ég mæti ekki með neinar risastórar væntingar. Ég set mér auðvitað alltaf þau markmið að gera vel á mótum, þess vegna spilum við þessa íþrótt, en ég ætla að taka þetta eitt högg í einu, einn dag í einu, og sjá hvað gerist. Aðalatriðið er að njóta þess og læra eins mikið og ég get um minn eigin leik og sjá hvað bestu kylfingar heims eru að gera svona vel.“

Í fyrra varst þú fyrsti íslenski kylfingurinn til að leika á bandaríska áhugamannamótinu (U.S. Amateur). Núna ertu sömuleiðis fyrsti Íslendingurinn sem spilar á U.S. Open. Hversu mikils virði er það fyrir þig?

„Það er mikill heiður og ég er afar þakklátur fyrir allan þann stuðning sem ég fæ að heiman. Ég er stoltur af því að vera þaðan. Það er virkilega gaman að koma frá litlum stað þar sem manni líður eins og allir standi að baki manni og hvetji mann áfram. Þetta er klárlega stór áfangi því við eigum fullt af frábærum og hæfileikaríkum kylfingum. Ég vona bara að einn daginn bætist í hópinn og við verðum tveir eða þrír Íslendingar að spila á þessum vettvangi í einu. En jú, ég er mjög hamingjusamur og vonandi verð ég ekki sá síðasti til að brjóta þessa múra. Það er alltaf gaman að ná svona áföngum.“