Erfitt hjá Haraldi í lokin í Höfðaborg
Lokadagurinn á Circa Cape Town mótinu á Áskorendamótaröðinni í Suður Afríku gekk ekki nógu vel hjá Haraldi Franklín Magnús. Hann lék hann á þremur yfir pari og endaði mótið jafn í 39. sæti á fimm höggum undir pari.
Haraldur lék fyrstu tvo hringina á 68 höggum og eftir þriða hringinn á pari og var í góðum málum. Hringur upp á þrjá yfir pari, 75 högg, í lokin sendi hann niður listann en um tíma á þriðja hring var Haraldur í 6. sæti mótsins.
Á lokahringnum var Haraldur í ágætum málum eftir sex holur, á einu höggi undir pari. En síðustu tólf holur mótsins af 72, fékk hann sex skolla, fleiri en hann hafði fengið á 60 holum á undan.
Haraldur heldur áfram keppni í S-Afríku en næsta mót verður á Fancourt golfsvæðinu sem all nokkrir Íslendingar þekkja og hafa leikið golf á.
