YellowRU til höfuðs R11
Kylfingar hafa ekki farið varhluta af því að ný kylfulína Taylor Made sem samanstendur af hvítum ásum (e.driver) og pútterum, hefur tröllriðið golfmarkaðnum undanfarna mánuði. Ekki nóg með það að kylfurnar séu fallegar, heldur eru þær einnig mjög vel hannaðar og hefur fjöldi atvinnukylfinga sem eru á mála hjá öðrum vörumerkjum snúið sér að R11 ásnum. Má þar helstan nefna Luke Donald, en hann hefur leikið með Taylor Made R11 með Mizuno gripi, en það er einmitt merkið sem Donald er á mála hjá.
Kylfuhönnuðir hafa þurft að setjast að teikniborðinu til að finna svör við þessu mjög vel heppnaða útspili Taylor Made. Nú er ekki nóg að setja á markað lengsta ásinn, heldur hefur vægi útlitsins aukist til muna. hefur nú brugðist við þessu og á teikniborðinu er ás sem mun að öllum líkindum fá markaðsheitið "Yellow RU". Ekki nóg með það að ásinn sé gulur, heldur er hér um að ræða orðaleik á ensku, þar sem enska orðið yellow er einnig notað um það að vera ragur eða huglaus. Nafn ássins má því þýða yfir á íslensku "Ertu ragur". Hönnun ássins er á algeru frumstigi, en hugsanlegt hefur talist að sjálfur Tiger Woods muni fyrstur sjást opinberlega með kylfuna á The Open - en hún verði ekki komin á almennan markað fyrr en seint í haust - eða snemma á næsta ári.
Guli liturinn er fenginn að láni frá bílaframleiðandanum Ford. - En þetta er sami litur og Ford hefur til margra ára notað svokallaðan Race Yellow lit á bíla sína, með tvöfaldri svartri rönd eftir endilöngum bílnum, en standard sköft á YellowRU verða einmitt svört. Með þessu vonast Nike til að höfða til karlmennsku viðskiptavina sinna, enda fátt í Bandaríkjunum sem þykir meira karlmennskutákn en Mustang GT.
