Steele leiðir með einu fyrir lokahringinn í Texas
Góður endasprettur hjá Brendan Steele á þriðja hring á Valero Texas Open mótinu tryggði honum eins höggs forystu fyrir lokahringinn í mótinu. Steele lék þriðja hringinn á 68 höggum eða fjórum höggum undir pari en hann fékk fjóra fugla á síðustu sex holunum.
Steele er samtals á sjö höggum undir pari og er einu höggi á undan Cameron Tringale þegar aðeins lokahringurinn er eftir í mótinu. Kevin Chappell og Brandt Snedeker eru jafnir í þriðja sæti á fimm höggum undir pari.
Kylfingarnir Pat Perez, Charles Howell og Adam Scott eru einnig í baráttunni um sigurinn í mótinu og eru á fjórum höggum undir pari. Scott á titil að verja í mótinu og varð um síðustu helgi í öðru sæti í Masters mótinu. Hann þykir því líklegur til að berjast um sigurinn í kvöld.
