GolfTV – Byrjunin ljómandi góð,“ segir Guðjón í Intersport
„Byrjunin hjá okkur hefur verið ljómandi góð og fólk er almennt ánægt með að sjá góð verð. Við erum mjög ánægðir,“ segir Guðjón B. Gunnarsson, verslunarstjóri nýrrar golfbúðar í Intersport Lindum.
Kylfingur.is leit við í gær í verslunni og er gott úrval af kylfum, skóm, fatnaði og öllu því sem kylfingurinn þarf á að halda á golfvellinum. Fyrir voru fimm golfverslanir á höfuðborgarsvæðinu þegar forráðamenn Intersport réðust í opnun nýrrar golfbúðar í Intersport Lindum. Þrátt fyrir að markaðurinn sé harður þá er Guðjón bjartsýnn.
„Styrkur okkar liggur í yfirbyggingu Intersport. Við getum leyft okkur að leggja lægri álagningu á vörur og það vonandi skilar sér í betra verði og ánægðum viðskiptavinum,“ segir Guðjón. Hann segist finna fyrir auknum áhuga kylfinga þegar skammt er í golfsumarið.
„Við erum auðvitað öll að bíða eftir hærra hitastigi en menn eru farnir að vakna og vilja prófa kylfur og gramsa í þessu. Hér er hægt að prófa kylfur og fá mælingu. Hér er allt sem kylfingurinn þarf í golfið, hvort sem það er fatnaður, skór eða kylfur.“
Nánar er rætt við Guðjón í myndbandinu hér að neðan.
