Miðvikudagur 26. nóvember 2014 kl. 08:00

GolfTV: Stenson sló ótrúlega löng högg á lokamótinu í Dubai

Henrik Stenson var í miklu stuði þegar hann varði titilinn á DP lokamótinu á Evrópumótaröðinni um síðustu helgi. Sænski kylfingurinn varði titil í fyrsta sinn á atvinnumannaferlinum og hafði betur í baráttunni gegn Rory McIlroy en Stenson sigraði með tveggja högga mun.

Stenson var gríðarlega öruggur í teighöggunum og sló langt þegar hann þurfti á því að halda. Sem dæmi má nefn þá hitti hann 82% af brautum í upphafshöggunum sem voru um 290 metra löng að meðaltali. Aðeins Rory McIlroy sló lengra að meðaltali á þessu móti. Stenson var með 9 gráðu Callaway X2 Hot dræver í pokanum í Dubai, með 45 tommu skafti  og 60 gr. Oban Tour Blue skaft.

Dræverinn var ekki eina kylfan sem Stenson sló langt með í Dubai en hann dúndraði einu höggi með 3-trénu um 270 metra en boltinn var í karga og flaug hann yfir vatn og inn á flötina á 14. Stenson er með Callaway Diablo Octane Tour 3-tré, sem er 13 gráður og með Graffalloy Blue skaft.  

Stenson sló um 245 metra langt  högg með 4-járninu í öðru högginu á 14. á þriðja keppnisdegi mótsins. Hann var með Callaway's Legacy Black járn (3-PW) með Modus 120X sköftum.