Stenson leiðir í New Jersey
4 Aces GC með örugga forystu í liðakeppninni
Svíinn, Henrik Stenson, sem leiddi LIV Golf Bedminster eftir fyrsta hring ásamt Bandaríkjamanninum Patrick Reed, hefur skilið sig frá hópnum fyrir lokahringinn í dag.
Stenson lék annan hringinn á 69 höggum eða á 2 höggum undir pari Trump National vallarins og er samtals á 9 höggum undir pari, þremur höggum betur en Bandaríkjamaðurinn Dustin Johnson, sem skilaði einnig inn skori upp á 2 högg undir par á öðrum hringnum. Patrick Reed lék ekki vel á hringnum en hann kom í hús á 2 höggum yfir pari og er samtals á 5 höggum undir pari líkt og Carlos Ortiz frá Mexíkó og Talor Gooch frá Bandaríkjunum en Gooch lék frábært golf - skollalausan hring upp á 64 högg eða 7 högg undir par.
Í liðakeppninni er það lið 4 Aces GC sem er efst fyrir lokahringinn á 20 höggum undir pari, sex höggum betur en lið Majesticks GC.