Minni spámenn í toppbaráttunni - hola í höggi á fyrsta degi!
Bandaríkjamaðurinn Ryan Brehm er einn af þremur kylfingum sem deila efsta sæti á Valspar mótinu á PGA mótaröðinni en kappinn gerði sér lítið fyrir og fór holu í höggi á 17. braut á fyrsta hring. Með honum eru Stephan Jaeger og Adam Schenk á 5 höggum undir pari.
Brehm hefur ekki verið í toppbaráttunni á mótaröðinni að undanförnu og leikið tuttugu yfir pari samtals í síðustu fjórum mótum. Hann hefur ekki komist í gegnum niðurskurðinn í 14 af síðustu 17 mótum sem hann hefur tekið þátt í þannig að lífið er ekki alltaf dans á rósum hjá atvinnumönnum.
Hann negldi hins vegar ofan í á 17. braut með 7-járni og náði draumahögginu og tyllti sér á toppinn í mótinu með Jaeger og Schenk en þremenningarnir eru meðal minni spámanna á PGA mótaröðinni.
Ryan Brehm 66 (-5)
Stephan Jaeger 66 (-5)
Adam Schenk 66 (-5)
Jordan Spieth 67 (-4)
Lucas Glover 67 (-4)
Maverick McNealy 67 (-4)
